Tola ooltummaan , faayidaa osoo hin argatiin kaka’umsa ofiitiin qaamni kamiyyuu osoo hin dirqisiisin, beekumsa qabaniin humnaafi maallaqqa qabanin namoota rakkatan gargaaruudha. Ofirra darbanii isa kaaniif yaaduu, warra dagataman yaadachuu, warra hirkoo dhabaniif hirkoo ta’uufi kan abdii dhaban immoo abdii itti horuudha. Tola ooltotni immoo hojii eebbifama kana yeroo hojjetan, sanyii, saala, bifaan, amantaa, afaaniifi siyaasaa bu’uura gochuun osoo hin taane namni nama ta’uu isaatiin qofa ulaagaa taasisuudhaan, walqixa tajaajiludha.
Hojiin tola ooltummaa, waliin jireenyaafi tokkummaan biyyaa akka cimu, hariiroon hawaasummaa akka jabaatu, nageenyaafi waliigalteen biyyaa akka uumamu, kaayyoon misoomaas galma akka gahu, faayidaa qabu irratti hundaa’e aadaa akka ta’uufi tola ooltootni jaalala biyyaafi uummata isaaniif qaban gochaan akka ibsaniif kan bocame sagantaa biyyaalessaa akka ta’e ni himama.
Sadarkaa idil addunyaatti tola ooltootni lakkoofasaan hedduu ta’an fedhii isaan qaban irratti hundaa’uun dameelee hojii garaagaraa irratti ni hirmaatu. Itoophiyaattis hawaasni hubannoo tajaajila tola ooltummaa irratti qabu baroottan duraa keessatti gadii aanaa turus, yeroo ammaa, lakkoofsi namoota tajaajila tola ooltummaa irratti hirmaatan daran dabalaa jiraachuu ragaaleen ni agarsiisu. Kutaaleen hawaasaa hundi hojii tola ooltummaarratti hirmaatanis, lakkoofsi dargaggoota tajaajila tola kennan garuu olaanaadha. Akka biyyaatti dargaggootni hedduun hojii tola ooltummaa garaagaraa irratti hirmaachuun dirqama lammummaa isaanii bahacha turaniiru, bahachaa jirus.
Naannoo Amaaraa bulchiinsa sablammii Oromoo aanaa Jillee Dhummugaatti dargaggootni hojii tola ooltummaarratti bobba’uun hawaasa isaanii tajaajilaa jiraachuu dubbataniiru. Dargaggoo Abduramaan Mohaammad, hojii tola ooltummaa gannaatiin namoota harka qalleeyyiifi dadhaboo ta’an gargaaruun dirqama lammummaa isaa bahachaa jiraachuu dubbateera. ‘’Hojii tola ooltummaarratti bobba’uun namoota dadhaboo gargaaruun cinaatti boqonnaa sammuu namaaf kenna’’ jechuun himeera. Dargaggoonni yeroo isaanii iddoo hin taanetti dabarsanis hojii milkaawaa akkanaa kanarratti akka hirmaatan dhaamsa isaa dabarseera.
Jiraataan aanichaa inni biroo dargaggoo Ahmad Adam, hojii tola ooltummaan namoota rakkatan gargaaruu, kan beela’aan nyaachisuun, kan dhukkubsatan yaalchisuuniifi kanneen mana dhabaniif mana ijaaruun gahee isaa bahachaa jiraachuu dubbateera.
Jiraattuu aanaa Jillee Dhummugaa aadde Faaxumaa Waleen hojii tola ooltummaa kanarraa fayyadamoo ta’uu dubbataniiru. Manni isaanii jalaa jigee, yeroo roobni roobu, bakka dhaqan dhabuun rakkachaa turuu kan himan aadde Faaxumaan, yeroo ammaa garuu manni isaanii tola ooltootaan ijaarame, rakkoon isaaniitiis waan furameef gammachuu isaaniitti dhagahame ibsaniiru.
Aanichatti bara kana tola oltoota kuma 58 ol hirmaachisuun, kutaalee hawaasaa kuma 84 ol fayyadamaa taasisuuf hojjetamaa jiraachuu kan himan immoo itti gaafatamaa waajjira dargaggoofi Ispoortii aanichaa obbo Umar Ibraahimidha. Kanaanis lammiileen hedduu tajaajila tola ooltummaa kanarraa fayyadamaa jiraachuu himaniiru.
Daraggoonni humna, yeroofi beekumsa isaanii utuu hin qusatin hojii tajaajila tola ooltummaarratti bal’inaan kan hirmaatan yoo ta’e, hawaasa bal’aa fayyadamaa taasisuurra darbanii misooma biyyaa si’eessuu keessattis gumaacha isaan irraa eegamu bahachaa jiraachuu isaanii hubachuu qabu kan jedhan itti gaafatamtichi keessattu kutaalee hawaasaa harka qal’eeyyii gargaaruu keessatti gahee olaanaa waan qabaniif dargaggoonni bal’inaan akka hirmaataniif waamicha dhiheessaniiru.Tajaajilli tola ooltummaa imimmaan haadhoolii, hedduu, abbootiifi namoota dadhaboo ta’an hedduu kan haqee ta’uus kaasaniiru.
Bulchiinsa sablammii Oromootti bara kana namoota tajaajila tola ooltummaa kennan kuma 200 ol ta’an kutaalee hawaasaa hundarraa hirmaachisuuf hojjetamaa jiraachuu Qajeelcha dargaggoofi Ispoortii bulchiinsa sablammi Oromootti ogeessi hirmaannaa, fayyadamummaafi sosocho’insa dargaggootaa obbo Habtaamuu Lataa himaniiru. Kutaalee hawaasaa kana keessatti dargaggoota kuma 100fi kuma 35fi 756 hirmaachisuuf karoorfame gara hojiitti galamuu dubbataniiru.
Kutaalee hawaasaa tola ooltummaa irratti hirmaachisuuf karoorfame keessaa jalqaba kanarratti tola ooltoota gara kuma 150 ta’an gara hojiitti galuun hojiilee hedduu hojjechaa jiraachuu himaniiru. Dameelee hojii 17tiin dargaggoota tajaajila tola ooltummaa kennan bobbaasuun hojjetamaa jiraachuu kan himan obbo Habtaamuun, hojiileen kunneenis, bolla biqiltu qopheessuu, manneen haaraa qaama dadhabdootaa gandoota 130 keessatti ijaaruu, akkasumas gandoota eeraman keessaa suphaa manneen 260 ta’an suuphuu, nageenya naannawa isaanii akka kabachisaniif poolisii naannawaa waliin ta’uun hojjechuu, walitti dhufeenya cimsuuf dargaggootni hawaasa ollaa waliin hariiroo jabeessuu hojii hubannoo cimsuu akka hojjetan taasisuu, barnoota gannaa barattootaaf kennuu, meeshaalee barnootaa barattootaaf walitti qabuufi dhiiga arjoomuun hojiilee ganna kanaa hojjechuuf karoorfamanii hojjechaa jiran ta’uu dubbataniiru.
Kanaanis kutaalee hawaasaa kuma 400 ol ta’an gosoota hojii garaagaraan fayyadamaa taasisuuf hojjetamaa jiraachuus eeraniiru. Hojii tola ooltummaa kanaanis baasii mootummaan baasuu qabu birrii miiliyoona 1tuqaa tokko ol ta’u akka bulchiinsa sablammiichaatti hambisuuf hojjetamaa jiraachuu himaniiru.
Manneen haaraa 46fi manneen qaama dadhabdoota 31 suuphamus eeraniiru. Maaddii qoodachuu waliin walqabatees midhaan kuntaalaa kuma 1 fi 369 harka qalleeyyiif kennamuu kaasaniiru. Yerooma jalqabbii kana keessatti, baasii bulchiinsi sablammichaa baasuu qabu birrii miiliyoona 96 ol ta’u hambisuun danda’amus ibsaniiru.
‘’Hojiin tola ooltummaa, ganna qofaa miti kan hojjetamu’’ kan jedhan obbo habtaamuun, hojiin kun waqtii boonaas haala itti fufinsa qabuun hojjetamaa turuu himaniiru. Manneen qaama dadhabootaa ijaaruu, oomishaalee gahaan yeroon sassaabuu, qotuufi maaddii qooddachuun hojiilee tola ooltummaa boonaan akka bulchiinsa sablammichaatti hojjetamaa kan turan ta’uu akka fakkeenyaatti kaasaniiru. Kanaanis hojiin tola ooltummaa akka bulchiinsa sablammii Oromootti haala itti fufinsa qabuun boonaafi gannaa hojjetamaa jiraachuu mirkaneessaniiru.
Hojii gaarummaa qabu hojjechuun yeroofi bakkaan kan daangeeffame miti jechuun hubachisaniiru. Tola ooluufi gaarummaa hojjechuun qalbii nama gammachiisu bira dabree biyya jaalalaan tokkoomte uumuu keessattis qooda olaanaa waan qabuuf ummata yeroo tokko tajaajillee kan dhaabnu osoo hin taane itti fufiinsaan tajaajiluudhaaf qophii ta’uu barbaachisa jedhaniiru. Haalli muxannoo tajaajila tola ooltummaarratti jiru yeroo irraa gara yerootti dabalaa dhufuu kan kaasan obbo Habtaamuun, tajaajilichaan hojiileen baajata mootummaatiin hin hojjetamne hedduun raawwatamaa jiraachuu ibsaniuru. Tajaajilli tola ooltummaa aadaa ta’ee akka itti fufuuf hojiichi hirmaannaafi deeggarsa hawaasa bal’aa gaafata jedhaniiru.
Tola ooltummaan hawaasaafi hawaasaa walitti fiduun, hariiroon hawaasummaa akka cimu taasisuun, baasii mootummaa qusachuu, hawaasa humnaafi maallaqa hin qabne fayyadamaa taasisuufi garaagarummaa saboota gidduu jiru hambisuufis faayidaa olaanaa qabaachuu obbo Habtaamuun hubachisaniiru. Namni kamiyyuu lammii isaa hojjetee nyaachuu hin dandeenyeef deeggarsa taasisuufi hojii tola ooltummaa irratti gahee mataa isaa akka bahatu obbo Habtaamuun waamicha dhihessaniiru.
Alamuu Balaayiin
