እን አጌራ ይቶፒያ ክንቲው ዜርፍስ እሊው አሌምሊ ልኺትጝጝስ ካሊፃውሳ ካሊጝቶ፣
አቕቶስታ ምግባር ፅንታሳ እምፕልሳማ እሚኹሳ ክምንቶ አፌርጝስ እንፃኽስስቴታጊ
አግስቴ፡፡አጌራዳ ትክላሊስ 51 ሻይ ክንቲጝንካ ዝኩና፡፡እንጚዳ ክንታንኩሳጊ ክንታንትካዋ
አጌራስ ቴኬማንኩስታ ዎይሚስትካ ያኻንታ ፅሬቶ ፄውታታጊ አግስቲ፡፡
እቺሳማ ታክሳው፣ አጌራዋ እንካናው፣ጚጛራሳኪ ያኻ አጌራዋ ሌጌፅⶓ ካላውሳ
ክምንቶ ፌቴርጝስ ሊጊሲሚ ጊዝስ እሺኹሳ ክንቲውሳ ቴርቶ ኪስጝ ፋይፃንታ ያኻማ
አግስትጝስ ስካዊ ክንቲው ቴርትሾ ቱስታ፡፡
ዋሺኒኪ አጌርዳ ልግስ ይንትኹ ክንቲስስታ ክንትኹ አጌር አቕሲያኽ፡፡ ክንትጝ ቤኖ
ቼፍጝስታ ዋይሜ አግጝ ይቢቺ ያኻውላስ ካንቲስስታ ምግባር ፅንታስኪላ አድርትⶓ
ካሴው አኽጝስ ክንታንትካ ሼውቴ እሚጝ ፋይፄ፡፡
እምፕላ አጌራው ልግስስ ክንቲው ፃንኩት ቹዋ ስርያኽ፡፡ ክንቲው ፃንኩት
ሊኪስታኩ ሴልዴስ ፃንኩት ዝኩኹሳስታ እንፃኽስትኹ ይቢቺ ፌያውሳ ፍታኒውሳ
ቴርቶ ቤቴርጚያኽ፡፡
ፃንኩት ዝኩኽሳ ፍታኒውሳ ቴርቶ ቴግባራዋ ፄውጝስ ጋያኪ ፌይንኩ ልቓ አሜትካዳ
አጌር አቡቑ አችስ እይስታው 12ንቲ ቤኑ ፍታኒ ዴስስትኹዴስ ሊሊት ንኹ ሴልስ
ዩንቨርስቲዳ እይስትⶓ ጄሜራ፡፡
ክንቲውሳስታ ፍታኒውሳ ፃንኩቱሳ ችግሮ ኽይጝስ ፍታውቶ ማንዱኽሳ እንፅኼ
እንፃኽስትጝ ጉዳይ ካንታኩ አካልካዴስጊ ማንዲስቴ፡፡
“ቴንኬኩን ዌራሳ ይንፂ ኬዋላ” ናስታጊ ንጙዊ 12ንቲ ቤኑሳ አጌር አቩቑሳ ፍታኔ
ካፃንኩ ክንታንትካ እንኩዋጚኒ ዋይሚ ካቢስታቲታ ናካዴስ ጉሽፅካማ አንኮሊስኪ ያኻ
ሼው ፅንታስ ቴርቴካማ ፂኒስጝስታ ቴርትጝ ቱስቴ፡፡
እንፃኽስትኹ ይቢቺ ፌያው እንጚ ፍታኒው ቴርትስ ቴክኖሎጅኪላ እምፕል ቹዋ
ዲብ አኽጝስ ቴኬምስትጜ ካንትኹስ ዴስጝጝ ማንዲስቴ፡፡ሊሊትጙንኩ አካልካዴስ
ዙሚስታንኩ ክንቲውሳስታ ፍታኒውሳ ቴርቶ እንግርግራ ይጉፃንኩ አሱ ንባርካዴስ
እቺጝስ ትኩቶ ክንቲዳ ይቢቺዳ ፄውጝ ማንዲስቴ፡፡
ፍታኒው ኽስኹ ዎይሚ ክንታንትካውስታ ክንትፃንትካው ታምብዴስ ድምክና ቹዋ
ታብሉ ታምብ ኬፍቲኒ አኽጝስ ጄርካዋ ይስጝፅጝስስታ ፋይፃውሳጊ ፊትጝጝ ማንዲስቴ፡
፡
ክንታንትካ ፌዩንኩ ላጛ አሜትካዳ ካንትስትኹ 12ንቲ ቤኑ አጌር አቡቑ ፍታኒው
ዋይሚስ ጛጛርትጛሳ ሼቤርፃኑላስ ፋይፃውሳጊ ቤዴራ ቴርትጜ ፄውጝ ማንዲስቴ፡፡ እንጚ
ፍታኒው ወክትዳ ካንትስቱንኩ ችግርካዋ ኽይጝስ ካንታው አካልጊ እንፃኽስትጝ ቱስቴ፡፡
አዊ ቤረሰብ ቺፅጝፂዳ ዝኩንኩ ክንታንትካኪላ እርዳትጜካማ ፂኒስጝስስታ ፍታኒው
ቴርት ካሴውሳ ቴርቶ ቴግባራዋ ፄውጝስ ፌቴንስትጝ ቱስቴ፡፡
አጌርታኪ ያኻ ቤረሰብ ቺፅጝፂታ ካንትስትኹሳ 12ንቲ ቤኑሳ ዜሬቕቲኔ ዋይሜ
ሌጌፅጝስ ታምብዌንካ አካልካጊ ዝኮ እላቲው አክሞ ቴኬምስትጝስ ቴርትጝ ማንዲስቴ፡፡
ትክላሊስ ንጙዊኒ 12ንቲ ቤኑ አጌራ አቡቓው ፍታኒዳ ጉድ ዋይሜ ሜዜጌብስታታ
ክንቲ ጝና ቺፋ ሚንችካ እንፅኽካ አኮሜችስቴካ፡፡ እንሳ እድሎ ቴኬምስትጝስ ክንታንትካ
ቤዴራ ቴርትጚዳ ይስካማ ጉዶ ዋይሜ አግጝስ እንፃኽስትጝ ቱስቴ፡፡