ነፋስ በመስረቅ የተከሰሰችው ሀገር

በሰሜን ባሕር ቀጣና ቤልጄዬም የነፋስ ኃይል ማመንጫ መቅዘፊያዎቿን በነፋስ አቅጣጫ ወይም ትይዩ ከፊት በመትከሏ ሦስት በመቶ የሚሆን ኃይል ኔዘርላንድ እንደተሰረቀባት በመግለጽ መክሰሷን ኦዲቲ ሴንትራል ድረ ገጽ ባለፈው ሳምንት አስነብቧል::

የኔዘርላንድ የአየር ሁኔታ ትንበያ ዋና ስራ አስፈፃሚ የቤልጄዬም የነፋስ ኃይል ማመንጫ “ተርባይኖች” ከሀገሩ ማለትም ከኔዘርላንድ  አየር መስረቃቸውን ተናግረዋል:: ዋና ሥራ አስፈፃሚው ሬምኮ ቨርዚጅልበርግ ከቤልጂዬም ብዙሃን መገናኛ ድርጅት ጋር ባደረጉት ቃለ ምልልስ እንደተናገሩት ቤልጂዬም የነፋስ ሀይል ማመንጫ “ተርባይኖችን” ከኔዘርላንድ በፊት በመትከሏ ሦስት በመቶ የሚሆን  የነፋስ ኃይል ከኔዘርላንድ ይሰርቃሉ::

የነፋስ ኃይል መሰብሰቢያ “ተርባይን” ነፋስ ባለበት ትይዩ ሲተከል የሚኘው ኃይል እና በነፋስ ትይዩ ከተተከለ “ተርባይን” ጀርባ ሲተከል የሚኘው የኃይል መጠን የተለያየ መሆኑን ነው፡፡

የጠቆሙት- ዋና ስራ አስፈፃሚው::  ለዚህ በማሳመኛ ነጥብነት ያነሱት ከፊት ለፊት የሚተከሉ  “ተርባይኖች” ከፍ ያለ ኃይል  ወይም ግፊት ሲያገኙ ከኃላ የሚተከሉት የዓየር ፍጥነትም ሆነ ግፊታቸው የቀነሰ  መሆኑን ነው ያሰመሩበት::

የነፋስ ግፊት “ከተርባይን” ወይም መቅዘፊያ ማማ ከፊት እና ከኋላ ሲለካ የኃይል መጠኑ የተለያየ መሆኑን ያስረዱት ዋና ሥራ አስፈፃሚው በአገራት መካከል የተሻለ የተቀናጀ አሰራር እንዲሰፍንም ጠይቀዋል::

ከነፋስ ኃይል መሰብሰቢያ መቅዘፊያ ማማዎች “ተርባይኖች” ጀርባ የሚለካው የነፋስ ፍጥነትም ሆነ የሚገኘው ግፊት አነስተኛ መሆኑን ጠቁመዋል:: ለዚህ ከፊት ያሉ ተርባይኖች የነፋሱን ግፊት እንደሚቀንሱት ማረጋገጣቸውን ነው  ያሰመሩበት::

የኔዘርላንድ የአየር ሁኔታ ትንበያ ዋና ስራ አስፈፃሚ በሀገሪቱ በስተምእራብ በሚገኙ የነፋስ ኃይል መቅዘፊያ “ተርባይኖች” ባሉበት ቀጣና ሌሎች አገራትም ሊተክሉ ስለሚችሉ ችግሩ አሳሳቢ እንደሆነ ነው የጠቆሙት:: በመሆኑም ቅንጅታዊ አሰራር መዘርጋት ለነገ ወይም ይደር የማይባል ተግባር ሊሆን እንደሚገባ ነው ያሳሰቡት:: በመጨረሻም  የሰሜን ባህር ቀጣና ቀስበቀስ የነፋስ ኃይል ማመንጫ ማማዎች በብዛት ሊተከሉበት እንደሚችል ጠቁመው የአየር ስርቆት ወደ ግጭት አድጐም በአገራት መካከል ጦርነት እንዳያስነሳ መስራት እንደሚገባ በማሳሰብ ነው ያደማደሙት::

(ታምራት ሲሳይ)

በኲር የሰኔ 2 ቀን 2017 ዓ.ም ዕትም