ግዙፉ ብስክሌት

ሁለት ብስክሌት አድናቂ ወይም ልዩ ፍላጐት ያላቸው የፈረንሳይ ዜጐች ሰባት ሜትር ከሰባ ሰባት ሴንቲ ሜትር ርዝመት ያለው ብስክሌት ሰርተው አዲስ ክብረ ወሰን ማስመዝገባቸውን ኦዲቲ ሴንትራል ድረ ገጽ ሰሞኑን ለንባብ አብቅቶታል::

ኒኮላስ ባሪዮዝ እና ዴቪድ ፔይሮ የተሰኙት ፈረንሳውያን ከአምስት ዓመት በፊት ነበር በዓለማችን ግዙፉን ብስክሌት የመስራት ሀሳብን አንስተው ከስምምነት ላይ የደረሱት:: ሀሳባቸውን እውን ለማድረግም እቅድ አውጥተው ወደ ተግባር ለመለወጥ ወራት ወስዶባቸዋል::

ብስክሌቱን ከብረት እና እንጨት ሰርተው ለማጠናቀቅ በመቶዎች የሚቆጠሩ ሰዓታት ፈጅቶባቸዋል:: ግዙፉን ብስክሌት መሥራት እንደመንዳት ቀላል ባለመሆኑም ሥራው  ፈታኝ እንደነበር ድረ ገጹ አስነብቧል::

በብስክሌቱ የታሰረው ሰንሰለት (ቺንጋ) 16 ሜትር የሚረዝም ሲሆን የብስክሌቱ ፍጥነት በሰዓት ከ15 እስከ 20 ኪሎ ሜትር ብቻ እንደሆነ መረጃው ጠቁሟል:: ፍጥነቱ ዝቅተኛ የሆነውም  ግራ እና ቀኝ ሚዛኑን ጠብቆ ለማሽከርከር ፍጥነቱን መቀነስ ግድ ስለሚል እንደሆነ ነው ድረ ገጹ ያስነበበው::

የብስክሌቱ አሽከርካሪ መቀመጫ እና የፊት እና የኋላ  ጐማ ተመጣጣኝ ሆኖም ተገጥሞለታል:: ከጐማው እስከ አሽከርካሪው መቀመጫም ሰባት ሜትር ተለክቷል::

የብስክሌቱ ሰሪዎች ከኮርቻው እስከ ተሽከርካሪው ጐማ ላለው ክፍል ብረታ ብረት መጠቀም ውድ ስለሆነባቸው አሮጌ ከተጣሉ የቤት እቃ እንጨቶችን አካተው መስራታቸውን ይፋ አድርገዋል::

የግዙፉ ብስክሌት ሰሪዎች ዴቪድ እና ኒኮላስ የፈለጉትን ሰርተው ለማጠናቀቅ ሁለት ዓመታት ፈጅቶባቸዋል:: የድካማቸውን ውጤት ለዓለም ለማሳየት በክሊሞንት ከተማ በተዘጋጀው ዓመታዊ ፌስቲቫል ማቅረብ ችለዋል::

ግዙፉን ብስክሌት በትክክል የሚጋለብ መሆኑን ለማሳየት ከሁለት አንዳቸው በተግባር ማሳየት ይጠበቅባቸው ነበር:: ለአሽከርካሪ ወይም ለጋላቢነት ዴቪድ ፔይሮ ይሁን በሚለው ተስማምተው ሰሪዎቹ 100 ሜትር ያለምንም ረዳት   አሽከርክሮ በተግባር ማስመከርም ችሏል::

ግዙፉ ብስክሌት ቀደም ብሎ ከታያው ክብረ ወሰን 36 ሴንቲ ሜትር የበለጠ ሆኖ አዲስ ክብረ ወሰን መያዙንም ድረ ገጹ ጠቅሷል::

(ታምራት ሲሳይ)

በኲር ሰኔ 24 ቀን 2016 ዓ.ም ዕትም