ጠባቧ እስር ቤት

በፈረንሳይ እና በእግሊዝ ሀገራት መካከል ከሚገኙት ደሴቶች መካከል በሳርክ ደሴት ላይ በ1956 እ.አ.አ በግንብ የተሰራው የዓለማችን ጠባቧ ባለሁለት ክፍል እስር ቤት መሆኗን ኦዲቲ ሴንትራል ድረ ገጽ   ለንባብ አብቅቶታል::

የድረ ገፁ ጽሑፍ እንዳመለከተው ዛሬም አገልግሎት በመስጠት ላይ የሚገኘው እስር ቤቱ አምስት ኪሎ ሜትር በአንድ ነጥብ ስድስት ኪሎ ሜትር ስፋት እና 600 ነዋሪዎች ላለው ደሴት የሚመጥን ተደርጐ መሠራቱ ነው የተጠቆመው::

በደሴቷ ላይ የሚታሰሩ የወንጀል ተጠርጣሪዎች በጠባቧ እስር ቤት የሚቆዩት ለሁለት ቀናት ብቻ ነው:: ከዚያ በኋላ በእስር የሚቆዩ ከሆነ ሰፋ ያለ እስር ቤት በሚገኙበት አጐራባች ጉር ንሴይ ደሴት ይወስዳሉ::

በሳርክ ደሴት የወንጀል ተጠርጣሪ ወይም ወንጀል ፈፃሚ በየዕለቱ እንደማይከሰት ያተተው የድረ ገፁ ጽሑፍ አልፎ አልፎ ተጠርጣሪ ወንጀለኞችን ይዞ ለጥቂት ቀናት የሚቆዩትን ታሳቢ በማድረግ ነው ጠባቧ እስር ቤት የተገነባችው::

በደሴቲቱ ላይ ሕግ አስከባሪ አካላት በየዕለቱ የሚጠበቅባቸውን ተግባራት እየፈፀሙ እንደሚገኙ ያስነበበው ጽሑፍ ጠባቧ እስር ቤት በየዕለቱ በሰዎች እንደምትጨናነቅ ሰዎቹም ተጠርጣሪ ወንጀለኞች ሳይሆኑ ከየማዕዘናቱ የሚሰባሰቡ ጐብኚዎች መሆናቸውን አስምሮበታል::

በሳርክ እስር ቤት በጣም ታዋቂ ከሆኑ እስረኞች አንድሬስ ጋርዴስ ሥራ አጡ የኒውክሌየር ፊዚክስ ሊቅ ይገኙበታል:: ምሁሩ ደሴቷን የራሱ እንደሆነች ነበር የሚናገረው:: ይህንኑ እምነቱን ማንም ስራዬ ብሎ አድምጦት ያገናዘበውም አልነበረም::

ከፊል አውቶማቲክ የጦር መሣሪያ ይዞ ወደ ደሴቷ ያቀናው አንድሮስ ጋርዴስ እግሩ እንደረገጣት ደሴቷን ሙሉ በመሉ መቆጣጠሩንና በሱ ትዕዛዝ ስር መውደቋን ጽፎ በየቦታው ይለጥፋል::

አንድ ሬስ ጋርዴስ ይህንን የተለጠፈውን የተመለከተ በሥራ ላይ በነበረ ፖሊስ በቡጢ ተነርቶ በቁጥጥር ስር ይውላል:: መሣሪያውን ተነጥቆም በጠባቧ እስር ቤት ሊታሰር መቻሉን ነው ድረ ገፁ ያስነበበው።

ዛሬም ጠባቧ እስር ቤት አገልግሎት በመስጠት ላይ ናት። መስኮት ባይኖረውም መብራት እና ማሞቂያ ተገጥሞላታል።

(ታምራት ሲሳይ)

በኲር ሰኔ 3 ቀን 2016 ዓ.ም ዕትም