ቁጣን ያስከተለዉ ትርኢት

በጀርባው ላይ የድራጐን ምስል የተነቀሰ ፀጉር አልባ ውሻ በቤት እንስሳት ትርኢት ማቅረቢያ መድረክ መታየቱን ተከትሎ ከእንስሳት አፍቃሪዎች ዘንድ ከፍተኛ ቁጣ ማስነሳቱን ኦዲቲ ሴንትራል ድረ ገጽ ከሳምንት በፊት ለንባብ አብቅቶታል::

በቻይና ሻንጋይ ከተማ በተካሄደው የቤት እንስሳት ማሳያ መድረክ ቻይናዊው አሳዳሪ ጀርባው ላይ በስፋት ድራጐን ምስል የተነቀሰ ውሻን በማቅረቡ በህዝቡ ዘንድ ቁጣ አስነስቷል:: የውሻው ምስል በማህበራዊ ድረ ገፆች በመለቀቁም ብዙዎችን አነጋግሯል፤ ቁጣን ቀስቅሷል፤ ውግዘት አስከትሏል::

የሜክሲኮ ዝርያ የሆነው ውሻ ጀርባው ላይ ድራጐን ተነቅሶ፣ በቀኝ እግሩ የወርቅ ሰዓት፣ የወርቅ ሀብል ወይም ወፍራም ሰንሰለት አንገቱ ላይ ታስሮ የተነሳው ፎቶግራፍ በማህበራዊ ድረ ገጽ ለእይታ በቅቷል::

የውሻው አሳዳሪ በንቅሳቱ ወቅት ምንም አይነት ማደንዘዣ አለመጠቀሙንም ተናግሯል:: ይሄን የሰሙ በሙሉ የግለሰቡን ጨካኝነት ማሳያ መሆኑን ነው በአብነት የጠቀሱት::

የውሻው አሳዳሪ ወይም ባለቤት ውሻውን በታዋቂ የንቅሳት ጠቢብ ከዓመት በፊት ማስነቀሱንም ነው የተናገረው:: የሜክሲኮ ዝርያ የሆነው ውሻው ጀርባው ፀጉር አልባ መሆኑ ብቻ ሳይሆን ህመም ተቋቋሚ ወይም ለህመም ስሜት ተጋላጭነቱ አነስተኛ ነው ሲልም ሞግቷል የውሻው ባለንብረት::

ነቃሹ ጠቢብ በበኩሉ የውሻው ባለቤት (አሳዳሪ) እንዲነቅስለት ወደ መስሪያ ቦታው ሲያቀርብለት በርካታ ጥያቄዎችን አቅርቦለት እንደነበር እና አሳዳሪው ግን ደጋግሞ  እንዲነቅስለት በመጠየቅ ያስገደደው መሆኑን ነው እማኝነቱን የሰጠው:: ንቅሳቱን በውሻው ጀርባ ላይ ለመስራት አሮጌ የተጣሉ  ወይም የአገለገሉ መሳሪያዎችን መርፌ፣ ምላጭ የመሳሰሉትን መጠቀሙንም ነው በምላሽነት የሰጠው – ነቃሹ::

በማደማደሚያነት የተፈጠረውን ቁጣ እና ከተመልካች የታየውን ምላሽ መሰረት አድርጐ የትርኢት አዘጋጁ የውሻውን አሳዳሪ (ባለቤት)ከትርኢት ማስወጣቱን ሳውዝቻይና ሞርኒግ ፓስት መዘገቡን ድረ ገጹ አስነብቧል::

(ታምራት ሲሳይ)

በኲር የመስከረም 5 ቀን 2018 ዓ.ም ዕትም