ብቸኛው ቅጠላ ቅጠል በል

በዓለማችን ከሚገኙት 45 ሺህ የሸረሪት ዝርያዎች ብቸኛው ቅጠላ ቅጠል ወይም እፅዋት በል (ካርኒቨረስ)ባጋሀሪ ኪኘሊንጊ የተሰኘው መሆኑን ኦዲት ሴንትራል ድረ ገጽ ለንባብ አብቅቶታል::

በማእከላዊ አሜሪካ እና ሜክሲኮ በሚገኝ ደን ብቻ የሚኖረው ድር የማያደራው የሸረሪት ዝርያ እስከ ስድስት ሚሊ ሜትር ርዝመት ያለው ነው:: የሸረሪት ዝርያው የግራር ዛፍ ቅጠል ወይም ቀንበጥን ለምግብነት እንደሚያውል ለመጀመሪያ ጊዜ የታወቀው በ2001 እ.አ.አ  በኮስታሪካው የብራንዲስ ዩኒቨርስቲ ተመራማሪ ነው:: በ2007 እ.አ.አ በአሜሪካ ፔንስላቫኒያ ዩኒቨርሲቲ ተማሪ በሆነው ክሪስቶፈር ሚሃን ሸረሪቱ  ቅጠላቅጠል በል መሆኑ ዳግም ተረጋግጧል::

የሸረሪት ዝርያዎቹ  እንደሌሎቹ ድር የማያደሩት ነፍሳትን በማጥመድ ለምግብነት ስለማያውሉ ነው፤ ሲጓጓዙም በሸረሪት ድር ላይ በመንጠልጠል ሳይሆን በመዝለል ከቦታ ቦታ እንደሚጓጓዙ ተመላክቷል::

ባጋሀሪ ኪኘሊንጊ የተሰኘው የሸረሪት ዝርያ በአብዛኛው የግራር ዛፍ እንቡጥ ቀንበጦችን ነው ለምግብነት የሚያውለው:: እምቡጥ ለጋ ቅጠሎችን ቀረጣጥፎ ለሚበላው ሸረሪቱም ዋነኛ አስፈሪ ተቀናቃኞች አሉበት – ጉንዳኖች::

ጉንዳኖች የግራር ዛፍ እምቡጥ ቅጠሎችን ቀረጣጥፈው በማጓጓዝ አጠራቅመው የሚበሉ በመሆናቸው ከባጋሀሪ ኪኘላንጊ ጋር መፋጠጣቸው አልቀረም:: ሆኖም ተንኳሽ በቡድንም ሆነ በነጠላ የሚያጠቁት ጉንዳኖች ሸረሪቶቹን እንደሚያሸነፏቸው ነው የተገለፀው::

ባጋሀሪ ክኘሊንጊ ሸረሪቶች ጉንዳኖችን ተፋልሞ መርታት አይሆንላቸውም፤ አይሞክሩትምም፤ ለምግብነት የሚያውሉት ብቸኛ ቀምበጥ  ግራርን በመሆኑ የወረሩት ጉንዳኖች የሚበቃቸውን ቀረጣጥፈው ቀጣናውን እስኪለቁ መጠበቅ ግድ ይላቸዋል::

ሸረሪቶቹ በርቀት ጉንዳኖቹ ከቀንበጦቹ መራቃቸውን እና ግራሩ ከስጋት ነፃ መሆኑን ሲያረጋግጡም ቀንበጡ ላይ ተጣብቀው ለጋ ቅጠል እና እመቡጡን እንደሚበሉ ነው ያረጋገጡት – ተመራማሪዎቹ::

(ታምራት ሲሳይ)

በኲር የካቲት 3 ቀን 2017 ዓ.ም  ዕትም