ግዙፉ የተሽከርካሪዎች ማጓጓዣ

በዓለማችን 9100 ባለ አራት ጐማ ተሽከርካሪዎችን ጭኖ የማጓጓዝ ዓቅም ያለው መርከብ ቀደም ብሎ 8500 በመጫን አንደኛ የነበረውን በልጦ ቀዳሚ ሊሆን መቻሉን ኦዲቲ ሴንትራል ድረ ገጽ ሰሞኑን ለንባብ አብቅቶታል::

በቻይና ጂያንግዙ ከባድ ተሽከርካሪ ማምረቻ ኢንዱስትሪ በ2024 እ.አ.አ ነው የተመረተው -የተሽከርካሪ ማጓጓዥ መርከቡ፤ የጐን ስፋቱ 37 ነጥብ 5፣ ርዝመቱ  ደግሞ 200 ሜትር ተለክቷል::

የመረከቡ ስሪት ጠንካራ እንዲሆን የተጠበቡበት መሀንዲሶች በ14ቱም ወለሎች ተሽከርካሪዎችን የመሸከም ዓቅም አጐልብተውለታል:: የግዙፉ መርከብ አስደናቂነቱ የጭነት ልኩ ብቻ ሳይሆን ለአካባቢ ተስማሚ ማለትም ከባቢ ዓየርን የመበከል ደረጃው በእጅጉ ያነሱ መሆኑ በዋናነት ተጠቁሟል::  ለዚህ ደግሞ በመርከቡ የላይኛው ክፍል 1500 ካሬ ሜትር ስፋት ካለው የፀሀይ ሃይል መሰብሰቢያ ንጣፍ የሚገኝ ከብክለት የፀዳ ኃይልን ለመንቀሳቀሻ ማዋሉ በውጤትነት ተጠቅሷል::

ግዙፉ የተሽከርካሪ ማጓጓዣ መርከብ አሁን ላይ ከፀሃይ ብርሃን ከ30 እስከ 35 በመቶ ኃይል በመሰብሰብ ተለምዷዊውን ከብስባሽ የሚገኝ ነዳጅ  መተካት ችሏል::

የጭነት ማጓጓዣ መርከቦች ድርጅቱ “ሆግ አውቶ ላይነርስ” የበላይ ኃላፊ ሰብጆርን ዳሀል ድርጅታቸው በቀጣይ መርከቦቹን ሙሉ በሙሉ ከብክለት በፀዳ ኃይል ለማንቀሳቀስ ማቀዱን አስታውቀዋል::

ለዚህም በድረጅታቸው ውስጥ ያሉትን 12 ግዙፍ መርከቦች በ2027 እ.አ.አ የካርበን ልቀታቸውን ዜሮ ለማድረስ ተግተው እየሰሩ መሆናቸውን ነው ያሰመሩበት::

በባህር ማጓጓዣ ዘርፍ የሚሰሩ በርካታ ግዙፍ ድርጅቶች መኖራቸውን የጠቆሙት ኃላፊው በተናጠል ብቻ ሳይሆን ከሌሎች ጋርም በመተባበር እና በመቀናጀት የድርጅቶቹ ማጓጓዣዎች ሙሉ በሙሉ ከበካይ ልቀት ነፃ እንዲሆኑ እንደሚሰሩ ነው ቃል የገቡት::

(ታምራት ሲሳይ)

በኲር የመጋቢት 8 ቀን 2017 ዓ.ም  ዕትም