ልጆች እንዴት ሰነበታችሁ? አሁን ያለንበት ወቅት የዓመቱ ማጠናቀቂያ የፈተና ወቅት ነው፤ ልጆች ፈተና ማለት የተማርነውን ነገር ምን ያህል እንዳወቅን ለራሳችን እና ለአስተማሪዎቻችን የምናሳይበት ልዩ መድረክ ነው። ልክ አንድ እግር ኳስ ተጫዋች ለጨዋታ እንደሚዘጋጀው ሁሉ እኛም ለፈተና ስንዘጋጅ በጥሩ ስሜት እና በትክክለኛ መንገድ መሆን አለበት። ፈተናን ሳንፈራ በደስታ እና በራስ መተማመን ለማለፍ የሚረዱን ዋና ዋና ነጥቦች የሚከተሉት ናቸው።
ጊዜን በአግባቡ መጠቀም
ፈተና ከመድረሱ በፊት ቀደም ብሎ መዘጋጀት መጀመር ፍርሃትን ይቀንሳል። በየቀኑ ጥቂት ሰዓታትን ለጥናት መመደብ እና ሁሉንም ትምህርቶች በአንድ ቀን ለማጥናት አለመሞከር ይመረጣል። ለአስቸጋሪ ትምህርቶች ተጨማሪ ጊዜ መስጠት እና የጥናት ጊዜ ሰሌዳ ማውጣት ሥራችንን ያቀልልናል።
ምቹ የጥናት ቦታ መምረጥ
የምናጠናበት ቦታ ጸጥ ያለ፣ ብርሃን ያለው እና ከሚረብሹ ነገሮች የራቀ መሆን አለበት። ስናጠና ቴሌቪዥን ማጥፋት፣ ስልክ እና ታብሌቶችን ማራቅ ትኩረታችን እንዳይሰረቅ ይረዳል። ደብተሮቻችንን፣ መጻሕፍቶቻችንን እና እስክሪብቶቻችንን በቅርብ አዘጋጅቶ ማስቀመጥ ጊዜን ይቆጥባል።
የጥናት ስልቶችን መቀየር
ትምህርትን በንባብ ብቻ ሳይሆን በተለያዩ መንገዶች ማጥናት ለአእምሯችን ይመቻል። ዋና ዋና ነጥቦችን በደማቅ ቀለም ማስመር፣ አጫጭር ማስታወሻዎችን መጻፍ እና ስዕሎችን መሳል ማስታወስን ያቀላል። ጓደኞቻችንን ወይም ቤተሰቦቻችንን ጥያቄ እንዲጠይቁን ማድረግ እና እርስ በርሳችን መጠያየቅ እውቀታችንን ያጠናክረዋል።
አእምሮንና አካልን መንከባከብ
ጥሩ ውጤት ለማምጣት የአካል እና የአእምሮ ጤና እጅግ አስፈላጊ ነው። በየቀኑ ከስምንት እስከ ዘጠኝ ሰዓት መተኛት አእምሯችን ያጠናነውን ነገር በደንብ እንዲያከማች ይረዳዋል። እንደ አትክልት፣ ፍራፍሬ እና ወተት ያሉ ጤናማ ምግቦችን መመገብ እንዲሁም በቂ ውኃ መጠጣት ለአካላችን ብርታት ይሰጣል።
በፈተና ቀን መረጋጋት
በፈተና ቀን ጠዋት ላይ ቁርስ በአግባቡ መመገብ እና ወደ ትምህርት ቤት ቀድሞ መድረስ ጭንቀትን ያስወግዳል። ፈተናው ሲሰጥ መመሪያዎቹን በጥንቃቄ ማንበብ እና ቀላል የሆኑትን ጥያቄዎች አስቀድሞ መሥራት በራስ መተማመንን ይጨምራል። አንድ ጥያቄ ከባድ ከሆነብን ሳንደናገጥ አልፈነው መጨረሻ ላይ ተመልሰን ማየት እንችላለን ይላል አሜሪካን ሳይኮሎጂካል አሶሲዬሽን ላይ ያገኘነው መረጃ።
ተረት
ዝሆን እና ብቸኛው ዝንጀሮ
በአንድ ውብ ጫካ ውስጥ ጃምቦ የሚባል ግዙፍና ደግ ዝሆን ይኖር ነበር። በዚያው ጫካ ውስጥ ደግሞ ቶቶ የሚባል አዲስ እና ጓደኛ የሌለው ብቸኛ ዝንጀሮ ነበረ።
አንድ ቀን ኃይለኛ የዝናብ ማዕበል ተነስቶ ወንዙ መሙላት ጀመረ። ትንሹ ቶቶ በአንድ ዛፍ ቅርንጫፍ ላይ ተንጠልጥሎ በጭንቀት ይጮኽ ነበር። ጃምቦ የቶቶን ድምፅ ሰምቶ በፍጥነት ወደ ወንዙ ሮጠ። ሊሰበር በተቃረበው ዛፍ ላይ የነበረውን ዝንጀሮ አየው እና ረጅም አፍንጫውን ዘርግቶ እንዲዘል ነገረው።
ቶቶ በፍጥነት ወደ ዝሆኑ አፍንጫ ላይ ዘለለ። ጃምቦም በሰላም አንስቶ ሰፊ ጀርባው ላይ ካስቀመጠው በኋላ ከማዕበሉ ነፃ ወደሆነ ሞቅ ያለ ዋሻ ውስጥ በደኅንነት አደረሰው።
ዝናቡ ሲቆም ቶቶ ጃምቦን በደስታ አቀፈው። ከዚያ ቀን ጀምሮ ቶቶ ብቸኝነቱ አበቃ፤ ሁለቱ የጫካው ምርጥ ጓደኛሞች ሆኑ። ታሪኩም ደግነት ዘላቂ ጓደኝነትን ለመመሥረት ምርጡ መንገድ መሆኑን ያስተምረናል።
ምንጭ፡- የኤሶፕ ተረቶች።
ሞክሩ
- እጅና እግር የለውም፤ ነገር ግን ዛፍ ላይ በቀላሉ ይወጣል። ይህ ምንድን ነው?
- ክንፍ ኖሮት መብረር የማይችል፣ ነገር ግን በጣም በፍጥነት የሚሮጥ ትልቅ ወፍ ማን ይባላል?
- ሳይዘሩት ይበቅላል፣ ሳይታጨድ ይረግፋል። ይህ ምንድን ነው?
መልስ
- እባብ
- ሰጎን
- ፀጉር
ነገር በምሳሌ
ካልዘሩት አይበቅልም፣ ካልቀጠፉት አይጠወልግም፦
ማንኛውም የምናገኘው ውጤት ወይም ነገር አስቀድመን በሠራነው ጥረት እና ሥራ ላይ የተመሠረተ መሆኑን ያስተምራል።
ታጥቦ ጭቃ፦
አንድን ስህተት ወይም መጥፎ ነገር ከተዉት በኋላ እንደገና ተመልሶ ያንኑ ስህተት መሥራትን ያመለክታል።
የቤት ሥራን (ጉዳይን) ለነገ አታቆይ፦
ዛሬ መሠራት ያለበትን ተግባር ወይም ትምህርት ወደ ሌላ ቀን ማስተላለፍ ሥራን እንደሚያከማችና እንደሚያስጨንቅ ያስተምራል።
(ቢኒያም መስፍን)
በኲር የሰኔ 8 ቀን 2018 ዓ.ም ዕትም