የካንሰር ስርጭት ለምን ፈጣን ሆነ?

ህዋሳት በውስጣቸው የሚገኝ ፈሳሽን እንደ ሞገድ ግፊቱን ለኃይል ምንጭነት በመገልገል መንቀሳቀስ መቻላቸው በሰውነት ውስጥ ካንሰር እንዴት በፍጥነት እንደሚሰራጭ ማመላከቱን ሳይንስ ዴይሊ ድረ ገጽ  አስነብቧል::

በአሜሪካ የኦሪገን ጤና ሳይንስ ዩኒቨርሲቲ በመረጃ ምንጭነት ለንባብ እንዳበቃው ህዋሳት ከዚህ ቀደም እንደሚታመነው በአንድ ቦታ የተወሰኑ አይደሉም፤ ምክንያቱ ደግሞ በውስጣቸው የሚገኝ ፈሳሽን እንደሞገድ የኃይል ምንጭ አድርገው መንቀሳቀስ ይችላሉና ነው:: ተመራማሪዎቹ በተገነዘቡት አዲስ እውነት ህዋሳት ከአንድ ጥግ ወደ ሌላው በአካል ላይ የሚደርስ ጉዳትን ለመጠገን እና ገንቢ ንጥረ ነገር ለማድረስም ያጓጉዛሉ::

ህዋሳት በማጓጓዝ ሂደት  በ”ዲፊውዠን” ወይም ስርገት እንደሚገለገሉ ነበር የሚታመነው- በጠበብቱ:: አሁን ላይ ተመራማሪዎቹ ባደረጉት ጥልቅ ምርምር ግን የተጐዳ አካልን ለመጠገን እና የገንቢ ምግብ እንሽርሽሪትም/ዝውውርም/ ሆነ በካንሰር ከተጠቃ ህዋስ ወዳልተጠቃው የመዛመት ሂደቱ ተመሳሳይነት ሊኖረው እንደሚችል ደርሰውበታል::

የካንሰር ስርጭት በካንሰር የተጠቃ ህዋስ በውስጡ ያለ ፈሳሽን እንደ “ስፖንጅ” በሽታው ካለበት ወደ ሌለበት በመጫን ወይም በመጭመቅ መሰራጨት እንደሚችልም ነው የደረሱበት – ተመራማሪዎቹ:: በዚህም የካንሰር ስርጭት ፈጣን መሆኑን ተገንዝበዋል::

በመጨረሻም በካንሰር የተጠቃ ህዋስ ካልተጠቃው ያለውን ልዩነት በመገንዘብ የበሽታውን ስርጭት ገቶ መድሃኒት ለመሻት ስንቅ ማግኘታቸውን ተመራማሪዎቹ አስገንዝበዋል።

(ታምራት ሲሳይ)

በኲር የሚያዚያ 5  ቀን 2018 ዓ.ም ዕትም