ትራፊክ ምንድን ነው?

ለጆች እንዴት ሰነበታችሁ? ልጆች ወደ ትምህርት ቤት ስትሄዱ እንዲሁም ወደ ቤት ስትመለሱ የትራፊክ ሕግን ተከትላችሁ ነው አይደል? ለመሆኑ ትራፊክ ምን ማለት ነው?

ትራፊክ ማለት በመንገድ ላይ የሚንቀሳቀሱ ተሽከርካሪዎች፣ እግረኞች እና እንስሳት አጠቃላይ እንቅስቃሴን የሚገልጽ ቃል ነው። በከተሞችም ሆነ በገጠር መንገዶች ላይ የምናያቸው መኪናዎች፣ ሞተር ብስክሌቶች እና በእግር የሚጓዙ ሰዎች ሁሉ የትራፊክ አካል ናቸው። ይህ እንቅስቃሴ በስርዓት እንዲመራ ካልተደረገ ትርምስ እና አደጋ ሊፈጠር ስለሚችል፤ የትራፊክ ህጎች እና መመሪያዎች ተቀርጸው በተግባር ላይ ይውላሉ።

የትራፊክ ፍሰትን ለማስተካከል የተለያዩ መሣሪያዎች ጥቅም ላይ ይውላሉ። ከእነዚህም መካከል ዋነኛው የትራፊክ መብራት ነው። ቀይ መብራት መቆምን፣ ቢጫ መዘጋጀትን፣ አረንጓዴ ደግሞ መጓዝን ያዝዛሉ። ከዚህ በተጨማሪ የመንገድ ዳር ምልክቶች ለአሽከርካሪዎች እና ለእግረኞች ጠቃሚ መረጃዎችን ይሰጣሉ። ለምሳሌ የፍጥነት ገደብን፣ አደገኛ ኩርባዎችን ወይም ትምህርት ቤት መኖሩን የሚጠቁሙ ምልክቶች ለአደጋ ተጋላጭነትን ይቀንሳሉ።

ልጆች በትራፊክ ውስጥ ሲንቀሳቀሱ ልዩ ጥንቃቄ ማድረግ ይኖርባቸዋል። መንገድ ከመሻገራቸው በፊት መኪና አለመምጣቱን ለማረጋገጥ ወደ ግራ እና ወደ ቀኝ በጥንቃቄ መመልከት መሰረታዊ ህግ ነው። ሁልጊዜም ቢሆን “ዜብራ” ተብሎ በሚጠራው የእግረኛ ማቋረጫ መስመር ላይ ብቻ መሻገር እና በትራፊክ ፖሊሶች የሚሰጡ ትዕዛዞችን ማክበር ይገባል። በመንገድ ላይ ኳስ መጫወት ወይም መሮጥ እጅግ አደገኛ ስለሆነ ለጨዋታ ተብለው የተዘጋጁ ቦታዎችን ብቻ መጠቀም አስፈላጊ ነው።

የትራፊክ ፖሊሶች በመንገድ ላይ የሚገኙት ህግ መከበሩን ለማረጋገጥ እና የሰዎችን ደህንነት ለመጠበቅ ነው። መብራት በማይኖርበት ወይም መጨናነቅ በሚፈጠርበት ጊዜ እንቅስቃሴውን በእጃቸው ምልክት በመስጠት ያስተካክላሉ። ሕግ የሚጥሱ አሽከርካሪዎችን በማረም እና እግረኞች በሰላም እንዲሻገሩ በመርዳት ረገድ ትልቅ አስተዋጽኦ ያበረክታሉ።

ምንጭ፡- የኢትዮጵያ መንገድ ደህንነት እና መድን ፈንድ አገልግሎት

ተረት

ዝንጀሮ እና ኤሊ

ከዕለታት አንድ ቀን ዝንጀሮ እና ኤሊ በጋራ ሆነው አንድ የሙዝ ተክል ተከሉ። ሁለቱም ተክሉን ተንከባክበው አሳደጉት። ሙዙ በሰለ እና ለምግብነት ደረሰ። ዝንጀሮው በፈጣንነቱ ዛፉ ላይ ወጥቶ ሙዙን መብላት ጀመረ።

ኤሊው ከታች ሆኖ ሙዝ ቢጠይቅም፣ ዝንጀሮው ግን ብቻውን መብላቱን ቀጠለ። በዚህ ጊዜ ኤሊው ተንኮል ከመስራት ይልቅ ዝንጀሮው እንዲረዳው በብልሃት አነጋገረው። ኤሊው እንዲህ አለው፦ “ጓደኛዬ ዝንጀሮ ሆይ! እኔ እኮ ታች ሆኜ ሙዙ እንዳይወድቅ እና እንዳይበላሽ እየጠበቅኩ ነው። አንተም ብትሆን ብቻህን መብላት ድካም ይሆንብሃል፤ ስለዚህ የተወሰነውን ብታወርድልኝ አብረን በደስታ እንበላለን” አለው።

ዝንጀሮው ንግግሩን ሲሰማ ብቻውን መብላቱ ስህተት እንደሆነ ተረዳ። ጓደኛው ኤሊ ከታች ሆኖ ሲጠብቅ እንደነበረ በማሰብ አፈረ። ዝንጀሮው ብዙ የበሰሉ ሙዞችን እየቀጠፈ ለኤሊው አወረደለት። ዝንጀሮው ከዛፉ ወረደ እና ሁለቱም ጓደኛሞች ሙዙን በደስታ አብረው ተመገቡ። ችግሮችን በንግግር እና በብልሃት መፍታት እንደሚቻል ከተረቱ እንማራለን።

ምንጭ፡- የኢትዮጵያ የቃል ሥነ-ጽሑፍ።

ሞክሩ

1.  ዓይን የለውም ግን ያለቅሳል፣ ክንፍ የለውም ግን ይበራል፤ ሰማይ ላይ የሚታይ ይህ ነገር ማን ይባላል?
2. እግሮች የሉትም ግን ይሮጣል፤ አፍ የለውም ግን ይጮሃል። ሁልጊዜም ወደ ፊት እንጂ ወደ ኋላ አይመለስም። ምንድን ነው?
3. ተክሎች ምግብ ለማዘጋጀት እና ለማደግ የግድ የሚያስፈልጋቸው ከሰማይ የሚመጣ የብርሃን ምንጭ ምንድን ነው?

መልስ

1. ደመና
2. ወንዝ
3. የፀሐይ ብርሃን

ነገር በምሳሌ

‘‘ሳይደግስ አይጣላም”፡-

በህይወት ውስጥ አንድ መጥፎ ነገር ሲገጥመን ከዚያ መጥፎ ነገር ጀርባ ሌላ የተሻለ እና መልካም እድል ሊኖር እንደሚችል ያሳያል።

‘‘ነገርን ከስሩ፣ የውኃን ከጥሩ”፡- የአንድን ነገር ምንጭ ወይም መጀመሪያ በትክክል ማወቅ አስፈላጊ መሆኑን ይገልጻል።

“እግር የሄደበትን፣ ልብ ያውቀዋል”፡-

አንድ ሰው ያሳለፈውን ችግርም ሆነ ደስታ በውል የሚያውቀው ራሱ መሆኑን ይገልጻል።

(ቢኒያም መስፍን)

በኲር የሚያዚያ 19 ቀን 2018 ዓ.ም  ዕትም